Il-Preżentazzjoni tal-Mulej - Jum il-Mulej

«Ħadu lit-tifel lejn Ġerusalemm biex jippreżentawh lill-Mulej.» Illum irridu nidħlu aħna wkoll fit-Tempju ta’ Ġerusalemm, iżda fuq il-ponot ta’ subgħajna. Nieqfu ftit f’rokna biex naraw ix-xena li l-Evanġelista Luqa jurina. Hemm Marija u Ġużeppi li ħadu fuq dirgħajhom lil Ġesù, dak li sa jwettaq il-wegħda tas-salvazzjoni. Xmun u Anna huma żewġ profeti xjuħ, iżda mħeġġin u żgħażagħ fl-Ispirtu, li għarfu n-«novità» li ġab dan it-tfajjel. Hu juri lil Alla bla ma juri ruħu żżejjed. Alla jiġi fis-satra. Il-preżent, l-istorja, l-eżistenza tal-bniedem hija l-post li fih Alla jħobb juri ruħu. Ma għandniex infittxu lil Alla f’dinjiet mhux konkreti, iżda sewwasew fid-dinja ċ-ċkejkna li ddawwarna. L-ewwel attenzjoni tagħna mela għandha tkun lejn il-ħwejjeġ l-aktar ċkejknin li ngħixuhom ta’ kuljum. F’dan l-għarfien biss, aħna u nidħlu fil-qalba fil-paġna tal-ħajja tagħna ta’ kuljum, inkunu nistgħu nilmħu bl-umiltà l-passi ta’ Alla, inkunu nistgħu nagħrfuh u nilqgħuh. Alla jħobb jgħammar fil-ħajja tagħna ta’ kuljum flimkien magħna. U hu sewwasew hemm li hu jiġi biex isalvana, f’din is-sempliċità tiegħu li bosta drabi ma nifhmuhiex, iżda hi tibni l-eżistenza tagħna.