Id-29 Ħadd matul is-sena A
Did-darba nsibu lil Ġesù jeħles lilu nnifsu minn nasba li riedu jdaħħluh fiha l-għedewwa tiegħu. Ninnutaw li n-nasba għamluhielu żewġ gruppi li kienu għedewwa ta’ xulxin: il-Fariżej, li kienu ħarriesa u mgħallmin tal-Liġi, u l-Erodjani, li kienu l-partitarji tas-sultan Erodi. Dawn ma kinux jinħamlu bejniethom għax filwaqt li l-Fariżej kienu ta’ fidi safja u jħobbu lil pajjiżhom, l-Erodjani kienu kollaboraturi ta’ Ruma, għax ir-Rumani kienu ħallew lil Erodi jsaltan, għalkemm għamlu minnu sultan-pupazz. Dakinhar dawn ftiehmu li jonsbu lil Ġesù biex jaqbduh f’xi kelma u jixluh. Hi ħaġa tajba li Lhudi jħallas it-taxxa lil Ċesri (l-imperatur Ruman)? Il-Fariżej kienu jgħidu le, għax b’hekk wieħed ikun qed ifixkel il-miġja tal-Messija li fil-fehma tagħhom kellu jeħles lil Israel mill-ħakma tal-barrani. L-Erodjani, bil-kontra, kienu jgħidu iva, għax dak kien l-imperatur li ħallielhom is-sultan li huma tant kienu jħobbu. Bit-tweġiba tiegħu Ġesù wriehom li ma jżomm ma’ ħadd minnhom. Biha Ġesù wera lilna kif għandha tkun l-imġiba tan-Nisrani quddiem is-setgħa ċivili. Kull setgħa ġejja minn Alla. Hemm xi ħaġa ta’ Ċesri li qabel mhijiex ta’ Alla wkoll? Għalhekk meta n-Nisrani jħares il-liġijiet ċivili u jkun ċittadin tajjeb – anki jekk min imexxi ma jkunx jogħġbu jew ma jkunx ġust – dan ikun qed iqim u jobdi lil Alla nnifsu.